මේ පෝස්ට් එක ලන්ඩන් ගොඩයා ලියන්නේ අන්තිමට ලියපු පෝස්ට් එකෙන් මාසෙකුත් දවස් ගණනකුත් පහුවෙලා. හේතුව මේකයි. හදිස්සියේම ලන්ඩන් ගොඩයාගේ අලුත් අධ්‍යාපන වාරය පටන් ගත්තා. ඉතින් ලන්ඩන් ගොඩයාට කොච්චර උවමනාව තිබ්බත් බ්ලොග් එක පැත්තෙවත් එන්න වෙලාවක් හදාගන්න අපහසු වුනා අනිත් වැඩත් එක්ක. හදිස්සියෙන්ම ලන්ඩන් ගොඩයාට මේ පෝස්ට් එක ලියන්න හිතුනේ අද දවසේ ලන්ඩන් ගොඩයට සහභාගී වෙන්න ලැබුනා ඉතාමත් ශ්‍රද්ධාවන්ත වැඩකට. ඒ තමයි අපේ අර්ජුන අයියාගේ උපන් දිනය වෙනුවෙන් "අර්ජුන-දර්ශන" මිත්‍රයන් දෙන්නා සුදානම් කරලා තිබුනා සාංගික දානයක් කිංස්බරි පන්සලේ. ලන්ඩන් ගොඩයාට අහන්න ලැබිච්ච විදියට ලන්ඩන් නුවර ප්‍රධානම බෞද්ධ විහාරය විදියට හදුන්වන්න පුළුවන් වෙන්නේ කිංස්බරි විහාරය. ඇත්තටම අපි අගය කරන්න අවශ්‍යයි මේ වගේ රටවල් වල යම් මට්ටමකින් හරි බෞද්ධයින්ට තමුන්ගේ හිත් සැහැල්ලු කරගන්න මේ වගේ තැන් තියෙන එක ගැන.
අපි කලින් සුදානම් කරගත්ත දවල් දානය සහ අනිත් අතුරු පස අරගෙන පන්සලට යද්දී ටිකක් පරක්කු වෙලා. උදේ 11.30 වෙද්දී බුද්ධ පූජාව පිළියෙළ කරන්න අවශ්‍ය නිසා අපි ටිකක් ඉක්මන් කලා. පන්සලේදී පිළියෙළ කරපු ෆ්රූට් සැලඩ් එක හදන්නත් ලන්ඩන් ගොඩයා උදවු කලා. පන්සලේ නායක හාමුදුරුවෝ කරපු දේශනාවේදී තමයි ලන්ඩන් ගොඩයාට කල්පනාවට ආවේ ලංකාවෙදිනම් මේ වගේ දේවල් වලදී ගොඩක් අත්දැකීම් තියෙන වැඩිහිටි පිරිස් සම්බන්ධ වෙනවා. ඒ වගේම මේ වගේ රටකදී තමුන්ගේ වියහියදම් සමබර කරගෙන ඉන්න ගමන් මේ වගේ දේකටත් හිත යොමු කරන්න පුළුවන් වෙච්ච එක ගැනත් හිතද්දී සිංහල බෞද්ධ තරුණයෙක් විදියට ලන්ඩන් ගොඩයාට හීන් ආඩම්බරයක් ඇති වුනා. ඇත්තටම "අර්ජුන-දර්ශන" දෙපලට ස්තුතිවන්ත වෙන්න ඕනේ ඒකාකාරී ජීවන රටාවෙන් පොඩ්ඩක් ඈත් වෙලා මේ වගේ දේකට සහභාගී වෙන්න ලන්ඩන් ගොඩයාට අවස්ථාවක් ලබා දීම ගැන. මේ කාර්යය සාර්ථක කරගන්න වචනයකින් හෝ උදව් කල සැමට ලන්ඩන් ගොඩයා හිස නමනවා. ඒ වගේම අර්ජුන අයියට සුභ උපන් දිනයකුත් ප්‍රීතිමත් අනාගතයකුත් එක සිතින් ප්‍රාර්ථනා කරනවා.
